កំពង់ស្ពឺ៖ នាថ្ងៃទី១២ ខែមករា ឆ្នាំ២០២៣ សមត្ថកិច្ចបានសម្រេចផ្អាកចរាចរណ៍ជាបណ្តោះអាសន្នត្រង់ផ្លូវជាតិលេខ៤៤ ឆ្លងកាត់ស្រុកថ្ពង ដោយសារតំបន់នោះរងការជន់លិចដោយទឹកភ្លៀងធ្លាក់មកប៉ុន្មានថ្ងៃជាប់គ្នា។
បើតាមព័ត៌មានផ្សាយដោយអគ្គស្នងការដ្ឋាននគរបាលជាតិ ការសម្រេចផ្អាកចរាចរណ៍ត្រង់កំណាត់ផ្លូវជាតិលេខ៤៤ នោះគឺដើម្បីធានាសុវត្ថិភាពដល់អ្នកដំណើរ។
ភ្លៀងធ្លាក់ជាប់ៗគ្នាប៉ុន្មានថ្ងៃកន្លងទៅនេះបានធ្វើឱ្យកម្រិតកម្ពស់ទឹកនៃទំនប់អាងទឹកអន្លង់ជ្រៃ ស្ថិតក្នុងភូមិអន្លង់ជ្រៃ ឃុំប្រាំបីមុម ស្រុកថ្ពង ខេត្តកំពង់ស្ពឺ ហក់ឡើងខ្ពស់ ដែលតម្រូវឱ្យអាជ្ញាធរត្រូវបើកទ្វារទឹកស្វ័យប្រវត្តិចំនួន៥ ជាបណ្តោះអាសន្នដើម្បីរំដោះទឹកចេញ។
អាស្រ័យហេតុនេះ រដ្ឋបាលខេត្តកំពង់ស្ពឺបានអំពាវនាវពលរដ្ឋ ជាពិសេសពលរដ្ឋរស់នៅតាមបណ្តោយដងស្ទឹងក្រាំងពន្លៃ បង្កើនការប្រុងប្រយ័ត្នខ្ពស់ដោយត្រូវរៀបចំទុកសម្ភារសំខាន់ៗនៅទីទួលសុវត្ថិភាពឱ្យបានត្រឹមត្រូវ ជាពិសេសមនុស្សចាស់ជរា កុមារតូចៗ ត្រូវប្រញាប់រួសរាន់ទៅកាន់ទីទួលសុវត្ថិភាពឱ្យបានមុនគេ។
ជាមួយគ្នានេះ រដ្ឋបាលខេត្តស្នើប្រជាពលរដ្ឋប្រុងប្រយ័ត្នខ្ពស់ ចំពោះខ្សែភ្លើងអគ្គិសនី ដែលអាចបង្កគ្រោះថ្នាក់ជាយថាហេតុ ខណៈតំបន់មួយចំនួនក្នុងស្រុកថ្ពង និងស្រុកឱរ៉ាល់ កំពុងតែរងការជន់លិចខ្លាំង៕
